Office有啲變態上司，跟佢嘅人好易感到氣餒、對公司失去歸屬感，自主權同成就感，而呢啲都係職涯發展嘅重要元素!
一旦你意識到跟緊個咁嘅老細，裸辭又唔係對每個人都可行嘅選擇，咁又可以點應對呢？下面有幾個方法可以試下：
1. 直接反映意見
有啲老細唔一定知自己啲行為有幾難頂。第一個方法就係同佢哋傾下。而咁做亦有助你分辨老細係唔係真係惡意，定只係佢哋嘅管理風格比較特別。
好多時，呢啲老細會有啲自戀。如果佢真係個極品老細，佢係唔會理你嘅意見。所以你禮貌而專業咁反映意見，而老細嘅反應係冷漠嘅話，咁你就會更加清楚自己嘅處景。
2. 試下睇通佢嘅行為
惡意嘅行為有時嚟自於不安感。可以退一步，試下了解(但唔好合理化) 對方點解咁需要控制其他人。如果見到呢啲行為背後嘅規律，睇下有無啲咩可以幫下佢，壓力少咗，佢可能就唔會咁渴望去壓迫所有人。
3. 打好其他關係
跟着個衰老細，好容易感覺被困住，但係唔駛打定輸數。同其他老細打好關係，不論係公司入面定其他公司都得。建立多啲自己team以外嘅connection可以幫你開闢新嘅機會，甚至可以搵到幫你擺脫困境嘅人。
望下公司入面，擴展你嘅人際網絡，搵下另一條路，同另一team接觸下，唔好留喺個自己難以解決嘅困局。
4. 保持健康心態
同一個極品老細交手就好似絕地求生！最終存活嘅通常唔係最強壯嘅人，亦唔係最訓練有素嘅人，而係心態最重要！
唔係話要欣然接受咁難頂嘅環境、或者掩蓋佢帶嚟嘅負面影響。但係你可以喺日常中搵下啲笑料，或者將注意力放喺好人好事上。就算要對住個極品老細，都可以感激有好同事，一齊慶祝下啲小勝利，保持正面嘅心理狀態係生存嘅關鍵！
5. 揾可信任嘅人求助
同一個惡頂老細一齊做嘢，你嘅權力好有限。喺情況變得更難應付之前，盡快揾其他人請教下點樣應對呢個情況，或者點樣擺脫出去。可以揾個靠得住嘅mentor，HR，或者你老細嘅老細。不過小心，一個衰老細背後可能反映出公司文化嘅更深層問題，如果係咁，就要搵一個公司以外嘅人求助。
6. 記錄低老細嘅劣行
記錄好你老細嘅具體惡劣行為，要有策略決定向邊個反映，特別要小心老細發現你講佢嘅壞話之後報復返你。一般嚟講，向HR報告會比較安全。
7. 同其他人一齊行動
極品老細嘅問題行為通常唔止你一個人受害。同其他同事傾下（面對面傾最好，唔好用文字短訊），了解佢哋同老細嘅經歷，然後喺一個可信任嘅人面前一齊提出你地嘅擔憂。當好多人一齊出聲嘅時候，公司就會見到呢個係一個客觀問題，唔止係一個做得唔開心嘅員工。
8. 遞信走人
如果你已經試過所有方法，而且有能力離開，咁就盡快走人啦。開始制定離開嘅策略，喺工作時間以外開始揾新工、擴大你嘅人脈圈，為散水走人鋪路！
Comentarios